Innsiktene frå “samtal og suppe“

Gjennom “samtal og suppe” har vi saman utforska kva som gjer eit fellesskap levande og inkluderande. Med ein varm bolle suppe i hendene og gode samtalar rundt bordet, har vi samla idear som ikkje berre speglar draumar og behov, men òg gjev oss konkrete retningar for framtida. Dette var ikkje berre eit møte – det var ei samling av perspektiv som har sådd frø av moglegheiter.

Her er innsiktene vi har teke med oss frå samtalane:

1. Sosiale og fritidsaktivitetar

Eit levande fellesskap er avhengig av møteplassar som skapar glede og tilhøyrsle:

• Intimkonsertar og spelkveldar: Ein stad for musikk, latter og leik der folk kan knyte band på tvers av generasjonar.

• Pop-up kafé: Ei låterskel løysing som kan vere hjarta i små og store arrangement.

• Temakveldar: Nostalgiske kveldar med retrospel, felles visningar av TV-program eller jakt- og fiskesamlingar.

Innsikt: Mange ønskjer uformelle, låterskel aktivitetar som kombinerer sosialt samvær med enkel moro.

2. Læring og utvikling

Samtalane viste eit sterkt ønske om å dele kunnskap og lære av kvarandre:

• Workshops for livsnødvendige ferdigheiter: Frå strikkekurs og handverk til kodeklubb for ungdom.

• Generasjonssamarbeid: Strikkeklubbar der pensjonistar lærer opp ungdom, og ungdomspodkastar der dei unge kan uttrykkje seg.

• Musikkverkstadar: Skapande rom der alle kan bidra til noko større.

Innsikt: Folk er svoltne på praktiske ferdigheiter og kreative rom, der kunnskapsdeling skjer på tvers av aldersgrupper.

3. Fellesskap og mangfald

Ein av dei mest verdifulle innsiktene var behovet for eit fellesskap som inkluderer alle:

• Treffplassar for tilflyttarar: Skap rom der nye i bygda kan finne si stemme og fellesskap.

• Aktivitetar for unge vaksne: Eit gap mellom ungdom og godt vaksne blei nemnt – korleis kan vi knyte dei unge vaksne tettare til fellesskapet?

• Tverrgenerasjonelle aktivitetar: Alt frå felles middagar til kreative verkstadar.

Innsikt: Inkludering handlar om meir enn deltaking – det handlar om å skape trygge rom der alle kan kjenne seg verdsett.

4. Praktiske løysingar

For å gjere ideane mogelege, kom det fram konkrete forslag til infrastruktur:

• Fleksible rom: Lokal som kan omformast til alt frå yoga til spelkveldar.

• Komfort og trivsel: Forbetre akustikk, tilføre fargar og skape varme rom med små, enkle grep.

• Uteplassar: Ein benk eller samlingspunkt utanfor for å invitere folk inn.

Innsikt: Små investeringar i trivsel og tilpassing kan gi store gevinstar for opplevinga av rommet.

Vegen vidare

Vi er djupt takksame for dei som deltok og delte sine tankar. Innsiktene frå “samtal og suppe” gjev oss ikkje berre idear, men ein reiskap til å gå vidare med ei sterkare kjensle av retning og samhald. Vi ser òg at det framleis er stemmer vi ønskjer å inkludere – særleg dei frå grupper vi ikkje nådde denne gongen. Dette vil vi prioritere når vi arrangerer slike samlingar igjen.

Saman har vi teke dei første stega mot å skape noko som kan vekse til å bli eit ekte sentrum for liv, kreativitet og fellesskap.

Har du fleire idear eller ønskjer å bidra? Vi vil gjerne høyre frå deg!

Suppe og samtale #1

Denne laurdagen kan du vere med på ein ny start for Safa-fabrikkutsalet – berre med litt mindre støv og langt meir suppe. Me drøymer om å gi tomrommet nytt liv som ein møteplass for bygda – men for å klare det, treng vi ideane dine.

Kva ser du for deg? Kanskje kan fabrikken bli ein stad for kreative verkstader, yoga, kaffikrok og marknader? Eller kanskje noko heilt anna? Me veit ikkje endå, men det er det som gjer denne prosessen så spesiell. Me ønskjer å høyre kva du meiner og kva draumar du ser føre deg i dette rommet.

Korleis går vi fram? Laurdag er berre byrjinga – den første av mange verkstader der me saman kan utforske kva dette rommet kan bli, og korleis me kan skapa noko verdifullt for bygda. Lokalet står klart i si råe form, som eit blankt lerret. Me inviterer deg til å bli med på ein samtaleverkstad der vi samlar tankar, idear og inspirasjon. Ingen forslag er for store eller for små!

Kvifor er dette viktig? Samnanger fortener ein stad der vi kan møtast, dele, skape, hente inspirasjon, eller berre ta ein kopp kaffi medan ideane kjem av seg sjølve. Me trur dette prosjektet kan bli noko heilt spesielt – eit samarbeid der diverse bidrag har en betydning, og der me saman skaper noko som varer.

Praktisk informasjon:

Dato: Laurdag 11. januar 2025

Tid: 13:00

Stad: Fabrikkutsalet på Safa, Tysse

Kom som du er! Me byr på ei varm skål med suppe og ei open samtale. Du treng ikkje ha noko klart å bidra med – berre ein vilje til å lytte, dele og vera med på ein spanande start.

Meld deg på! Gi oss eit hint om du kjem, eller tips oss om nokon andre som burde vera med. Me gler oss til å høyre kva du tenkjer og til å skape noko unikt saman.

Med varme helsingar,

Samnanger Mylderlag

Åtak på støv og spindelvev

Denne veka tok vi dei aller fyrste fysiske stega i utviklinga av Samnanger Mylderlag sitt nye rom i det historiske Safa-fabrikkutsalget.

Vi har grovreingjort, flytta inn treverk som midlertidig skal fungera som bord til første møtet – og deretter kan bli bokhyller eller noko heilt anna.

Rommet byrjar allereie å vakna til liv, og vi kan nesten høyra ekkoet av kreativitet og fellesskap som snart skal fylla dette spesielle knutepunktet.

No rettar vi blikket mot laurdag, då vi inviterer til den aller fyrste Samtal og suppe. Dette blir eit uformelt og varmt arrangement der bygdefolk, kreative sjeler og nysgjerrige kan møtast over ei rykande skål suppe for å diskutera framtida til Samnanger Mylderlag og korleis vi saman kan utvikla rommet vidare. Vi gler oss til å høyra dine idear og tankar!

Vi vil takka alle som har bidrege så langt – anten med tid, krefter eller oppmuntringar. Draumen vår tek form, og kvar einaste innsats blir sett stor pris på. Meir informasjon om Samtal og suppe finn du på nettsida vår. Vi håpar å sjå mange av dykk der!

Laurdagens første Samtal og suppe er berre byrjinga på mange idéverkstader der vi håpar å samla og høsta tankar og innspel frå dykk. Slik kan vi betre forstå kva som trengst for å gjera denne staden relevant og meiningsfull for mange.